Son xəbərlər

Əhmədiyyə Cəbrayılovun 100 illiyi münasibətilə poçt markası buraxılıb

azermarka
azermarka 321

Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən “Azərmarka” MMC tərəfindən İkinci Dünya müharibəsinin iştirakçısı, Fransa Müqavimət Hərəkatının görkəmli nümayəndələrindən biri, partizan Əhmədiyyə Cəbrayılovun anadan olmasının 100 illiyi münasibətilə poçt markası dövriyyəyə buraxılıb.

Buraxılış bir markadan ibarət blok şəklində hazırlanıb. Blokda İkinci Dünya müharibəsi illərində nasist Almaniyası tərəfindən işğalda olan Parisin divarlarından birinə “Chargo” (Xarqo) ləqəbli Ə.Cəbrayılovun axtarışda olmasını göstərən elanı yapışdıran Vermaxt əsgəri təsvir olunub.

Markada Ə.Cəbrayılovun portreti, blokun sol tərəfində Eyfel qülləsi, sağ tərəfdə, divarın üzərində isə Fransa Müqavimət Hərəkatının qruplarından biri olan “Maquis”in (Maki) emblemi təsvir edilib. Markanın buraxılmasında məqsəd görkəmli partizan Ə.Cəbrayılovun yerli və əcnəbi filatelistlər, dünya kolleksiyaçıları arasında təbliğ edilməsidir. Belarus Respublikasında 7000 tirajla çap olunmuş markanın müəllifi “Azərmarka”nın baş rəssamı Vüqar Əyyubovdur.

Poçt markası ilə yanaşı, 200 ədəd Birinci gün zərfi də hazırlanaraq satışa çıxarılıb.